Trouais p'tites histouaires

Zélie

Est Zélie qui r'viens d'cheu l'méd'chin en vélo. A pédale sec, alle a l'habitude eud sen vèlo vu qu'alle a pin d'vintue. Tout en Pédalant, as'dit: "J'ai frei au vente, comment qu'cha s'fait." A réfléchi pis tout d'un coup, a s'apercheu qu'alle a pin d'culotte! A fait d'mi tour, a ratourne cheu l'docteur pis alle i d'mande: " J'ont ti pin oubié ma culotte cheu vous docteur?" "A non, Zélie, vos ez rien oublié" ah ben, cha deu ête cheu l'dentisse alors!"

Polyte

Dedpis qu'il est pétit, eul Polyte est passionné pa l'fotball. I peut pin veir un ballon sans taper d'dans., Il a fait partie du club du pays, il y est toujou mais i joue pus, il est trop vieux. I voulait toujou aller à Paris pou veir l'équipe eud france dans l'grand stade. Il a fait d'z-économie pis un jou, le v'la parti. Il est cotent, i suis l'match, i gueule aveu z-aôtes quand qui rate eul but, i crie su l'arbite qu'est vendu pis i fait les commentaires. A la mi-temps, i pale eum p'tieu aveu sen veisin. Eul veisin i dit :  «  Est drôle que i'ai personne a côté d'vous, est toujou plein d'habitude ». Polyte i répond : « Eté la plache à ma femme mais alle est morte » Eul veisin est eum p'tieu gèné, « sie d'solé men pauv monsieur, mais vos-ez trouvé personne pou v'ni à sa plache ? » «  Ah bé non, i sont tous partis a s'n'enterrement. »

Les laveus d'carreaux

Natole et pis Zidor sont laveus d'carreaux. I z-ont un échafaudage pou aller neteyer les carreaux du haut. I sont bié n-équipés pis i bossent bié, i sont d'mandés partout oyou qu'no peut pin les fai pasqu'i sont trop grands, ou ben trop haut pis qu'on peut pin z-ouvri. Un coup, i faut qui' lavent çaulas d'l'useine. I mettent l'échafaudage, i passent la matineye à laver. Quand qu'i z-ont fini, i s'arcule pis i r'gadent leu boulot tout cotents, cha brille, i z-ont bié travaillé. Mais v'la ti pas, qui s'apecheuvent qui z-ont oubié eune tite fenète tout en haut, juste sous l'touais! I z-on pin envie de r'sorti tout leu saint frusquin, Natole a eune ideye: " sie mouins lourd que tei, no va monter su l'toit, tu vas me t'ni pa mes berdelle pis j'va fai çu p'tit carreau." Sitot dit, sitot fait, V'la Natole, suspendu pas ses berdelles en train d'neteyer çu p'tit carreau. Tout d'un coup, le v'la qui s'met à rigoler comme un bochu, Zidor i d'mande qui qui l'lfait rigoler, "J'étais en train d'penser qu'si mes berdelles pètent, tu vas t'les prende dans la figure, t'éras bonne meine!"

Mimi eud Barentin

U.R.C.